БЕВМЕ НА ЕДЕН ЗАЕДНИЧКИ ПОЕТСКИ НАСТАН, ЗАЕДНО ЧИТАВМЕ, ИМАШЕ ЕДНО МЛАДО МОМЧЕ ШТО ЈА ИНТЕРПТЕРИРАШЕ ПЕСНАТА „ВЕЧЕРВА БИ МОЖЕЛ ДА ГИ НАПИШАМ НАЈТАЖНИТЕ СТИХОВИ“ ОД ПАБЛО НЕРУДА, КОЈА НЕДОГОВОРЕНО ДВЕТЕ ЈА ЗНАЕВМЕ НА ПАМЕТ) 😊 ПА САКАМ ДА ТЕ ПРАШАМ: ЧИТАЈЌИ ЈА ПОЕЗИЈАТА НА НЕКОЈ ПОЕТ ШТО ЛИЧНО НЕ ГО ПОЗНАВАМЕ, ДУРИ НЕ МОЖЕМЕ ДА ГО ЗАМИСЛИМЕ НИТУ НЕГОВИОТ ГЛАС, НИТУ НЕГОВОТО ТРЕПЕРЕЊЕ НА РАКАТА ДОДЕКА ЈА ПИШУВА ПЕСНАТА, НО СТИХОВИТЕ ШТО ГИ НАПИШАЛ ДОПИРААТ ДО НАС, ТОГАШ КАКВА Е ПРЕНОСЛИВОСТА НА ЗБОРОВИТЕ ВО НЕГОВАТА ПЕСНА?
Тоа значи дека песната е успешна. Дека зборот има тежина и вредност. Дека авторот знаел што прави и додека крварел. Не влегол во патетика, достоинствено умирал. Патетика не можам да поднесам во животот, а тамам работа во литературата.
КОГА ПЕСНИТЕ ФОРМИРААТ ДИЈАЛОГ СО ЧИТАТЕЛОТ?
Кога се искрени, досетливи, кога те тераат да размислуваш, кога ти создаваат некое чувство, не е важно какво.
ДАЛИ ПОЕЗИЈАТА РАЃА СОМНЕЖ КАЈ ПОЕТОТ?
Поезијата раѓа секакви чувства кај поетот. И многу е здраво кога едно од чувствата е сомнежот. Да се сомневаш значи дека не си глупав. Сомнежот раѓа прашања. Прашањата сами по себе трагаат по одговор. Одговорите носат сознанија. Сознанијата носат промена. Никој не знае сѐ. Да не се сомневаш значи дека мислиш дека знаеш сѐ. А тоа е дрско и троа за потсмев.
КАКВИ ЧИТАТЕЛИ ПОСАКУВАШ ДА ИМАШ?
Најискрено, може и да ми се насмеете, ама си посакувам читатели како мене, кои читаат и меѓу редовите. Се воодушевувам кога слушам различни интерпретации за иста песна или збирка. Уживам во различните човекови умови. Ги сакам различностите.
Сакам искусни читатели, иако ми е убаво и кога некој што не читал многу литература, ќе ми каже што го бендисало во некоја песна.
КОГА ИМАМЕ ДОВЕРБА ВО ПОЕТИТЕ?
Кога не нѐ изневеруваат.
-БИЉАНА СТОЈАНОВСКА-
