КАКВО РЕШЕНИЕ СЕ КРИЕ ЗАД ИНДИВИДУАЛНОТО ПОЗНАВАЊЕ НА ПОЕЗИЈА?
Понекогаш, вистинските прашања се врвови на решенијата:
Врв од налив перо, што може да спои хартија со мастило.
Или врв од стрела, што може да повреди.
ПИШУВАЊЕТО ПОЕТСКА КНИГА Е...
Во моментите додека пишувате поетска книга, имате можност барем за момент да бидете како Хиријама, главниот лик од филмот „Совршени денови“ во режија на Вим Вендерс.
ДАЛИ МАГИСКАТА МОЌ ВО ПОЕЗИЈАТА Е БУНТОВНА?
Секако. Дали можете да замислите свет без Дејвид Боуви, на пример? Тоа би се случило доколку магиската моќ во поезијата не е бунтовна. Поезијата е толку моќна, што може да обликува и нови граматички времиња / Раѓајќи сегашно невозможно / И идно болно / Од минато несвршено.
КОЈ Е ВАШИОТ КРЕАТИВЕН ЦЕНТАР НА ПИШУВАЊЕ ПОЕЗИЈА?
За сега, филмовите. И насмевки што се како нож за образите. И бакнеж како оној
меѓу автопат и автомобилски гуми.
СТИХ ШТО СЕКОГАШ ЌЕ ГО ПАМЕТИШ?
Кога детето беше дете,
фрли стапче како харпун врз едно дрво,
и тоа уште трепери до денес.
И од нашиот Радован Павловски:
Подајте ми триножно столче
Во просторот да седнам
И сè што ве боли речете ми
Со метафора ќе го искамшикувам
-ДЕЈАН ТРАЈКОСКИ-
