КАКВИ ПОЕТСКИ АЛАТКИ СЕ КОРИСТАТ ПРИ ЧИНОТ НА ПИШУВАЊЕ?
Никогаш не сум размислувал за алатките во поезијата. Пишувам затоа што нешто во мене врие и вреви и сака да излезе. Се обидувам тоа што ќе го напишам да е на јазикот на кој што зборувам и да биде искрено.
КОЈА Е ПРЕДНОСТА ДА СЕ ЧИТА ПОЕЗИЈА?
Поезијата знае да фати кадар. Знае и да си игра со зборови. Знае да здоболи, но знае и да утеши. Знае да ѕирне таму кај што останатите уметности не можат. Знае да покаже нешто кое било на очиглед на сите, а за некое чудо, не сме имале очи да го видиме.
КОГА ПОЕЗИЈАТА СОЗДАВА БАЛАНС МЕЃУ ПОЕТОТ И ЧИНОТ НА ПИШУВАЊЕТО?
За мене, пишувањето поезија е на некој начин, свет чин. Понекогаш, низ тој процес созревам, понекогаш се утешувам, понекогаш само се радувам што некој ќе го прочита тоа што сум го напишал и тоа ќе му значи. Во секој случај, секогаш растам.
КАКО МОЖЕ ДА СЕ ДЕФИНИРА УМЕРЕНОСТА ВО ПОЕЗИЈАТА?
Јас скоро никогаш и во ништо не сум бил умерен. Поезијата може да биде умерена, пресметлива или осмислена, но мене лично таква поезија не ми се допаѓа. Поезијата мора да биде сирова, ненашминкана, соголена. Мора да гори.
ДАЛИ ПОЕЗИЈАТА ОСЛОБОДУВА ОД ТОВАРОТ НА СЕКОЈДНЕВИЕТО?
Секако дека ослободува. Поезијата, како и секоја друга уметност, е трансцедентна и покажува дека има нешто невидливо, поголемо од нас.
-ТОНИ ПОПОВ-
