КОРПОРАТИВНО УТРО
Намера имам
жено да те видам, хмм…
гола и боса.
Сонце нè буди
со цртежи по ѕидот
— пораснал денот.
Мамурно утро
ме брза на работа,
а сакам чорба.
Автобус на „Млаз“
ме отру од сабајле
ни крив, ни должен.
Тргни од овде
и освоj го светот.
Летиште Скопје.
Тргни од овде
и рашири Божји збор.
Летиште Охрид.
В раце ја имам
ламбата на Аладин.
Што да и правам?
Со букет кали
пешак сум на црвено
— сељак џентлмен.
Комшиско маче
низ ноќта мјаука
прв ден без мајка.
Дечиња песок
во кофичка си полнат
— море и радост.
Бранови велат:
Денеска нема плажа,
Ветрот е газда.
Симнувам јарем
од мудра глава. Збогум
корпорацијо!
Васко Марковски
ВАСКО МАРКОВСКИ е туристички водич, патеписец и литературен преведувач. Дваесетина години работел како новинар, патеписец и уредник во петнаесетина медиуми (радио, печатени и мултимедија). Oд 2018 целосно се посветил на професијата туристички водич. Автор е на поетската книга „Корпоративно утро“ (2013), на монографијата „Урбани легенди“ (Бегемот, 2018) и збирката репортажи „Непозната Македонија“ (Бегемот, 2020). Застапен е во неколку антологии на современата македонска поезија.
